بقلم التنين


هدف الاسلام السياسي (اخوان و سلفيين) مش تحقيق اهداف الثورة من عيش وحرية وعدالة اجتماعية، هدفهم كان من الاول الوصول والانفراد بالحكم.
كلام مرسي في طهران لما قال أن الثورة المصرية حققت كل اهدافها مالهوش اكتر من معنى.

الموضوع بقى واضح جدا بعد ما صرح خيرت الشاطر ان مشروع النهضة غير واضح الملامح وان الاعلام هو اللي فهم غلط، ضيف لده التصريح اللي من الاخر بتاع الشيخ حازم شومان اللي قال فيه "نستخدم الديموقراطية للوصول للحكم فقط".

من البداية و الاسلام السياسي بيثبت انه مع دوله اسلاميه مش مع الديموقراطية كاساس للحكم في مصر بعد الثورة، افتكروا معايا اللي كان بيتقال في الاول بداية بشومان: "ليبراليه يعني ايه يا برادعي، مدنيه يعني ايه يا برادعي" مرورا بشيخي المفضل عبد المنعم الشحات الشهير بالعبارة الصادقة: "الديموقراطية حرام وكفر بس مانقدرش نقول الكلام ده" و في خلال شهور كنا وصلنا لجمعة قندهار و اعلام السعودية كانت ملت ميدان التحرير.

الاسلام السياسي مش بتاع ثورة، بالعكس اي اعتراض علي الحاكم بالنسبة لهم خروج علي الحاكم و قتال الخوارج بيبقي قتال في سبيل الله.
و لا الاسلام السياسي بتاع حريات والكلام الفاضي ده، السيطرة علي الاعلام و تكميم الافواه ده بيعتبر اكبر مكسب حققه الاخوان من وصول مرسي للكرسي.
ولا هما بتوع حقوق انسان و مرأة، كلامهم و افعالهم عن انتهاكات العسكر للثوار من اول سميرة ابراهيم و البنات اللي العسكر كشفوا علي عذريتهم للبنت اللي الجندي المصري عراها و داس عليها بالبيادة في التحرير بتدل ان بالنسبه لهم حقوق المرأة المسلوبة مش مشكلة اصلا، و سلبيتهم تجاه مذبحة الاقباط في ماسبيرو وتهجيرهم اللي بيستمر كل شهر من قرية لقرية و الاخوان في السلطه معناها بكل بساطة انهم ناويين يغيروا اي شئ في حروب الفتن الطائفية
الاسلام السياسي مابيقفش جنب الثورات اللي بتحصل حوالينا، دي حتي اول زيارة لمرسي كانت للسعودية اللي رحبت ببن علي مش لتونس اللي من غيرها ما كنا شفنا ثورة ولا كان الاخوان وغيرهم طلعوا من السجون، فين التأييد المصري لسوريا ولا للسودان ولا للبحرين، حاجة تكسف و تقرف
الدم الثوري النقي لا يعني لدولة الاخوان شئ، لا بالخارج ولا بالداخل، مين الاهبل اللي فاكر انهم هيجيبوا حق الشهداء اللي ماتوا علي ايد نظام مبارك و عسكر طنطاوي، هما عملوا حاجة في محاكمة مبارك الهزلية؟ العسكر مش بيتحسبوا العسكر بدل حكم علي جرائم ضد الانسانية بياخدوا قلادة النيل، هو في خيانة للثورة اوضح من كده؟!

هو انا بتكلم علي الاخوان والسلفين مرة واحدة مع أن في فرق بين اهداف واخطائهم، الاخوان في السلطة ولازم يتحاسبوا علي محاولتهم لخلق نظام فاشي خاين للثورة انما السلفيين وضعهم مختلف لكن افكارهم الرجعية بيستغلها الاخوان عشان يكوشوا علي السلطة وكومبو الاسلام السياسي ده بيقتل اي امل في ان البلد دي تطلع خطوه واحده لقدام

اتنين ملهومش امان … العسكر والاخوان

كل الحاجات اللي الثوار بيعتبروها من مكتسبات الثورة من حرية تظاهر لحرية تعبير لانتقاد للسلطة بالنسبة للاسلام السياسي مش مكتسبات دي مشاكل لابد حلها و السيطرة عليها قبل ما تقلق قعدة مرسي علي الكرسي.

انا مش ضد الاسلاميين في المطلق، بس اللي بيعملوه و اللي بيقولوه لازم يخليني ضدهم، لكن لو اتعدلوا و ابتدوا يبنوا دولة العيش والحرية والعدالة الاجتماعية اللي الثورة قامت عشانها انا هبقي اول واحد يديهم حقهم

دولة الاسلام السياسي مش هي اللي عملنا الثورة عشانها، بالعكس الثورة قامت علي الدولة السلطوية الفاشية اللي بتقوم علي الكذب و اللي مش عايزه تغير حاجه لأن هدفها السلطة لا غير، ضد الحاكم المستبد اللي محدش يقدر ينتقده، الدولة دي اللي بيبنيها الاخوان و الحاكم ده اللي بيصنعوه من جديد هما فلول تانيين لنظام مبارك، هما نفس التفكير و طريقة التنفيذ بس بشكل جديد و كلام مختلف شويه

الاتجاة الحقيقي للاسلام السياسي من اخوان و سلفيين في جميع المجالات هو للوراء


صور: http://on.fb.me/P1kS30